गोविंदान॔द सरस्वती न्यासाच्या गीताध्यायी व गीता शिक्षिका सौ.रेखा उटगीकर आणि सौ.मंजुषा बुरुज वाले यांच्या पुढाकाराने ऑनलाइन व्हॉट्सऍप भगवद्गीता पठण वर्ग सुरू करण्यात आले . पहिल्या ग्रुप मध्ये साडेसातशे गीताध्यायींनी भगवद्गीतेची संथा घेतली. दुसऱ्या ग्रुप मध्ये सतराशे गीताध्यायींनी भगवद्गीतेची संथा घेतली . तिसऱ्या ग्रुप मध्ये पंधराशे गीताध्यायींनी संथा घेतली. चौथ्या ग्रुपचे १५३० गीताध्यायीं चे शिक्षण सुरू आहे. पहिल्या ग्रुपची संथा नोव्हेंबर मध्ये संपली. दुसऱ्या व तिसऱ्या ग्रुपची संथा मार्चमध्ये संपली. प्रत्येक ग्रुपला प्रत्येक अध्यायाचा अर्थ सारांश रूपाने पाठविण्यात आला. या सर्व कामांमध्ये सौ. सुजाता शेंबेकर, सौ. भारती महाजन, सौ .विजया प्रभू सौ अर्चना वाणी, सौ अनघा विद्वांस सौ. अनिता पुराणिक व सौ. श्रुती हेरवाडकर यांची मोलाची मदत झाली. संपूर्ण अठरा अध्यायांची संथा सौ. रेखा उटगीकर यांनी अतिशय उत्तम रीतीने ऑडिओ रेकॉर्डिंग च्या स्वरूपात त्यांच्या आवाजामध्ये तयार करण्याचे शिवधनुष्य यशस्वीपणे पेलले. त्यांची संथा ऑडिओ स्वरूपात ऐकताना त्यांच्यासमोर बसून संथा घेत आहोत असाच अनुभव येतो .प्रत्येक अध्यायाचा , आपल्या जीवनामध्ये व स्वभावामध्ये बदल घडवून आणण्याच्या दृष्टीने व आपण काय शिकले पाहिजे यातून या दृष्टीने अतिशय सोप्या शब्दांमध्ये सारांश रूपाने अर्थ सांगण्याचे शिवधनुष्य सौ. श्रुती हेरवाडकर यांनी यशस्वीपणे पेलले आहे .व्हाट्सअप ऑनलाईन भगवद्गीता पठण वर्ग सुरू करण्याची मूळ कल्पना मंजुषा बुरुजवाले यांची आहे .या कल्पनेला मूर्त स्वरूप देण्यासाठी त्यांनी खूप कष्ट केले. न्यासाचे विश्वस्त सौ. विनिता ताई केतकर आणि श्रीयुत विश्वास नवरे यांनी या उपक्रमाला प्रोत्साहन व पाठिंबा दिला त्यामुळे सर्व गीताध्यायींचा काम करण्याचा उत्साह द्विगुणित झाला . आजच्या covid-19 च्या प्रतिकूल परिस्थितीमध्ये अनेकांना जगण्याची उमेद देणारा व प्रतिकूल परिस्थितीमध्ये मन आनंदी आणि शांत ठेवून जगण्याची मानसिक शक्ती देणारा हा वर्ग समाजामध्ये लोकप्रिय होत आहे. व्हाट्सअप ऑनलाईन भगवद्गीता पठणाच्या या वर्गामध्ये सहभागी झालेल्या अनेक गीताध्यायींनी त्यांचे मनोगत व्यक्त केले आहे .वानगीदाखल एक-दोन मनोगते आपणासमोर ठेवत आहोत. व्हाट्सअप ऑनलाइन वर्गांच्या माध्यमातून भगवद्गीता घराघरात पोचण्याचे कार्य सुरू आहे आणि त्या निमित्ताने गोविंदानंद सरस्वती न्यासाचे संस्थापक कै. श्रीयुत नवरे गुरुजींची, *घराघरात गीता पोचवा* ही तळमळ काही प्रमाणात पूर्ण होत आहे याचे सर्व गीताध्यायींना समाधान आहे. उत्तरोत्तर या वर्गांच्या माध्यमातून भगवद्गीतेचा प्रसार होत राहावा व भगवद्गीता घराघरात पोहोचावी हीच ईश्वरचरणी प्रार्थना.

मनोगत

१) मी सौ स्निता वालावलकर आपणां सर्व गीताव्रतींना नमस्कार करते. कोरोना काळात विचारपूर्वक आपण या माध्यमाद्वारे संथा देण्याचे काम हाती घेतलेत या बद्दल आभार.माझ्यासारख्या गृहिणींना घरी राहून आपल्या वेळेनुसार याचा लाभ घेणे शक्य झाले. आपण समोरासमोर नाही याचा पूर्ण विचार करून शांत व सुस्पष्टपणे संथा दिलीत.तसेच या ज्ञानरूपी महासागरातील सारांशरूपी मोती सुलभतेने आमच्या ओंजळीत टाकलेत.खूप खूप आभार. ह्या पुढील वाटचालीत वारंवार आपल्या मार्गदर्शनाची गरज भासेल तेव्हां आपणांशी संपर्क करू शकते का? असेल तर योग्य वेळ कोणती? हे कळले तर बरे होईल. आपले गुरू-शिष्यांचे नाते असेच चालू राहावे हीच ईच्छा. पुढे कधीही प्रत्यक्षात भेटणे शक्य झाल्यास आनंद वाटेल.पुनश्च सर्वांना अभिवादन. जय श्रीकृष्ण.

३) रेखाताई, मंजुषा ताई, श्रुती ताई, सुजाता ताई, अनिता ताई,
सर्व गीताव्रती गुरुजनांना दंडवत आणि आपण दिलेल्या गीता संथे बद्दल मनापासून धन्यवाद!!
गोविंदानंद सरस्वती न्यासाच्या सर्वच चमूचे हा उपक्रम यशस्वीपणे
राबविल्या बद्दल हार्दिक अभिनंदन आणि पुढील उपक्रमांसाठी हार्दिक शुभेच्छा

३) नमस्कार गीतावाचन व पठण वर्ग चालू करुन खुप आनंद झाला. खुप दिवसां पासून गीता शिकायचे मनात होतेच. तुम्हा सर्वांमुळे हे शक्य होत आहे. तुमच्या सर्व टिम ला खुप खुप धन्यवाद. मी रोज नित्यनेमाने आपले ऑडिओ ऐकते व त्या प्रमाणे म्हणायचा प्रयत्न ही करते. हे कार्य असेच चालू रहावे ही विनंती. माझ्या कडून काही मदत हवी असल्यास मी आनंदाने करीन. धन्यवाद